ಉಡುಪಿ: ಧಾರ್ಮಿಕ ಮತ್ತು ಸಾಂಸ್ಕೃತಿಕ ಪರಂಪರೆಯ ನೆಲೆಯಾದ ಉಡುಪಿಯ ಶ್ರೀ ಕೃಷ್ಣ ಮಠದಲ್ಲಿ ನಡೆಯುತ್ತಿರುವ ಚತುರ್ಮಾಸ ವ್ರತದ ನಂತರದ ಮೊದಲ ಮಹೋತ್ಸವವಾದ ಲಕ್ಷದೀಪೋತ್ಸವವು ದ್ವಿತೀಯ ದಿನದ ಸಂಭ್ರಮಕ್ಕೆ ಸಾಕ್ಷಿಯಾಯಿತು. ಕಾರ್ತಿಕ ಮಾಸದ ಉತ್ಥಾನ ದ್ವಾದಶಿಯಿಂದ ಆರಂಭಗೊಂಡ ಈ ದೀಪೋತ್ಸವವು, ಕೃಷ್ಣನಗರಿಯನ್ನು ದೀಪಗಳ ಪ್ರಭೆಯಲ್ಲಿ ಮಿಂದೇಳಿಸಿದೆ. ಲಕ್ಷದೀಪೋತ್ಸವವು ಸಾಮಾನ್ಯವಾಗಿ ನಾಲ್ಕು ದಿನಗಳ ಕಾಲ ನಡೆಯುತ್ತದೆ. ದ್ವಿತೀಯ ದಿನದಂದು ಕೂಡ ಹಿಂದಿನ ದಿನದಂತೆಯೇ ಭಕ್ತಿಪೂರ್ವಕವಾದ ಪೂಜಾ ಕೈಂಕರ್ಯಗಳು ಹಾಗೂ ಆಕರ್ಷಕ ರಥೋತ್ಸವಗಳು ನಡೆದವು.

ದ್ವಿತೀಯ ದಿನದ ಪ್ರಮುಖ ಆಕರ್ಷಣೆಗಳು-

ಮಧ್ವ ಸರೋವರದಲ್ಲಿ ತೆಪ್ಪೋತ್ಸವ: ಸಾಯಂಕಾಲದ ಪೂಜಾ ವಿಧಿಗಳ ನಂತರ, ಮಠದ ಆಕರ್ಷಣೀಯವಾದ ಮಧ್ವ ಸರೋವರದಲ್ಲಿ ಶ್ರೀ ಕೃಷ್ಣ ಮತ್ತು ಶ್ರೀ ಮುಖ್ಯಪ್ರಾಣ ದೇವರ ಉತ್ಸವ ಮೂರ್ತಿಗಳನ್ನು ಸುಂದರವಾಗಿ ಅಲಂಕರಿಸಿದ ತೆಪ್ಪದಲ್ಲಿ ಇರಿಸಿ ತೆಪ್ಪೋತ್ಸವ ನಡೆಯಿತು. ಸಾಲು ಸಾಲು ದೀಪಗಳ ಮಧ್ಯೆ ತೆಪ್ಪವು ಸರೋವರದಲ್ಲಿ ಸಾಗಿದ್ದು ಭಕ್ತರ ಕಣ್ಮನ ಸೆಳೆಯಿತು.ಇದನ್ನು ಓದಿ; ಬಿಹಾರ ಚುನಾವಣೆ: ಮೊದಲ ಹಂತದ ಮತಪ್ರಚಾರಕ್ಕೆ ತೆರೆ, ಮತದಾನ ವೀಕ್ಷಿಸಲಿದೆ ವಿದೇಶಿ ನಿಯೋಗ; ಕಾರಣ ಹೀಗಿದೆ

ವೈಭವದ ರಥೋತ್ಸವ: ತೆಪ್ಪೋತ್ಸವದ ಬಳಿಕ ರಥಬೀದಿಯಲ್ಲಿ ವೈಭವದ ರಥೋತ್ಸವಕ್ಕೆ ಚಾಲನೆ ನೀಡಲಾಯಿತು. ರಥಬೀದಿಯ ಸುತ್ತಲೂ ಸಾವಿರಾರು ಭಕ್ತರು ಹಚ್ಚಿದ ಹಣತೆಗಳ ದೀಪದ ಬೆಳಕು ಕಂಗೊಳಿಸಿತು. ಶ್ರೀ ಕೃಷ್ಣ ಮತ್ತು ಮುಖ್ಯಪ್ರಾಣ ದೇವರ ಉತ್ಸವ ಮೂರ್ತಿಗಳನ್ನು ಗರುಡ ರಥದಲ್ಲಿ ಹಾಗೂ ಶ್ರೀ ಅನಂತೇಶ್ವರ ಮತ್ತು ಶ್ರೀ ಚಂದ್ರಮೌಳೇಶ್ವರ ದೇವರ ಉತ್ಸವ ಮೂರ್ತಿಗಳನ್ನು ಮಹಾ ಪೂಜಾ ರಥದಲ್ಲಿ ಇರಿಸಿ ರಥಬೀದಿಯಲ್ಲಿ ಪ್ರದಕ್ಷಿಣೆ ಮಾಡಿಸಲಾಯಿತು.

ಸಾಂಸ್ಕೃತಿಕ ವೈಭವ: ರಥೋತ್ಸವದೊಂದಿಗೆ ನಾದಸ್ವರ, ಪಂಚವಾದ್ಯ, ಮತ್ತು ಚಂಡೆ ವಾದ್ಯಗಳ ಘೋಷ ಮೊಳಗಿದ್ದು, ಆಕರ್ಷಕ ಸುಡುಮದ್ದುಗಳ ಪ್ರದರ್ಶನವು ರಾತ್ರಿ ಆಕಾಶವನ್ನು ಬೆಳಗಿಸಿತು. ಈ ಸಂಭ್ರಮದಲ್ಲಿ ಪರ್ಯಾಯ ಶ್ರೀಗಳು ಸೇರಿದಂತೆ ಅಷ್ಟಮಠಗಳ ಹಲವು ಯತಿಗಳು ಉಪಸ್ಥಿತರಿದ್ದು, ಭಕ್ತರಿಗೆ ಮಾರ್ಗದರ್ಶನ ನೀಡಿದರು.

ದಿನವಿಡೀ ಕೃಷ್ಣನ ನಾಮಸ್ಮರಣೆ ಮತ್ತು ಹಬ್ಬದ ವಾತಾವರಣ ಉಡುಪಿಯಲ್ಲಿ ನೆಲೆಸಿದ್ದು, ಸಾವಿರಾರು ಸಂಖ್ಯೆಯ ಭಕ್ತರು ಈ ಸಂಭ್ರಮದಲ್ಲಿ ಪಾಲ್ಗೊಂಡು ಕೃಷ್ಣನ ಕೃಪೆಗೆ ಪಾತ್ರರಾದರು.