ಮೆಕ್ಸಿಕೋ ಡ್ರಗ್ ಕಾರ್ಟೆಲ್ನ ದೊರೆ ನೆಮೆಸಿಯೊ "ಎಲ್ ಮೆಂಚೊ" ಒಸೆಗುರಾ ಸರ್ವಾಂಟೆಸ್ನ ಉದಯ ಮತ್ತು ಪತನ
ಐದನೇ ತರಗತಿಗೆ ಶಾಲೆಯನ್ನು ಬಿಟ್ಟ ಹುಡುಗನೊಬ್ಬ ಕೋಟ್ಯಂತರ ಡಾಲರ್ ಮೌಲ್ಯದ ಅರೆ-ಸೇನಾ ಸಾಮ್ರಾಜ್ಯವನ್ನು ಕಟ್ಟಿದ "ಎಲ್ ಮೆಂಚೊ"ನ ಭೀಕರ ಕಥೆಯಿದು. ಎಲ್ ಮೆಂಚೊನ ಬೆಳವಣಿಗೆಯು ಕಾರ್ಟೆಲ್ ಮಾನದಂಡಗಳ ಪ್ರಕಾರವೂ ತುಂಬಾ ಅಸಾಂಪ್ರದಾಯಿಕವಾಗಿತ್ತು.
1966 ರಲ್ಲಿ ದಕ್ಷಿಣ ಅಮೆರಿಕಾದ ಮೆಕ್ಸಿಕೋದ ಮಿಚೋವಾಕನ್ ನಗರದ ತೀವ್ರ ಬಡತನದಲ್ಲಿ ಇವನು ಜನಿಸಿದನು. ಇವನ ಅಪರಾಧದ ಪಯಣ ಮೆಕ್ಸಿಕೋದ ಆವಕಾಡೊ ಬೆಳೆಯುವ ಪ್ರದೇಶದಿಂದ ಪ್ರಾರಂಭವಾಯಿತು. ಕೇವಲ 14 ನೇ ವಯಸ್ಸಿನಲ್ಲಿ ಇವನು ಗಾಂಜಾ ತೋಟಗಳಿಗೆ ಕಾವಲುಗಾರನಾಗಿ ಕೆಲಸ ಮಾಡಲು ಪ್ರಾರಂಭಿಸಿದನು.
ಅಮೆರಿಕಾ ಪಯಣ ಮತ್ತು ಬಂಧನ: 1980 ರಲ್ಲಿ ಇವನು ಅಕ್ರಮವಾಗಿ ಕ್ಯಾಲಿಫೋರ್ನಿಯಾಕ್ಕೆ ವಲಸೆ ಹೋದನು. ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿ ಇವನನ್ನು ಬಂಧಿಸಲಾಯಿತು ಮತ್ತು ಹೆರಾಯಿನ್ ವಿತರಣೆಗಾಗಿ ಟೆಕ್ಸಾಸ್ನ ಫೆಡರಲ್ ಜೈಲಿನಲ್ಲಿ ಕಾಲ ಕಳೆದನು. 90 ರ ದಶಕದ ಮಧ್ಯಭಾಗದಲ್ಲಿ ಇವನನ್ನು ಮತ್ತೆ ಮೆಕ್ಸಿಕೋಗೆ ಗಡೀಪಾರು ಮಾಡಲಾಯಿತು.
ಮೆಕ್ಸಿಕೋದ ಜಲಿಸ್ಕೋಗೆ ಹಿಂದಿರುಗಿದ ನಂತರ, ಎಲ್ ಮೆಂಚೊ ವಿಪರ್ಯಾಸವೆಂಬಂತೆ ಪೊಲೀಸ್ ಅಧಿಕಾರಿಯಾಗಿ ಕೆಲಸ ಮಾಡಿದನು. ಈ ಪಾತ್ರವು ಅವನಿಗೆ ಕಾನೂನು ಜಾರಿ ತಂತ್ರಗಳ ಬಗ್ಗೆ ಆಳವಾದ ಜ್ಞಾನವನ್ನು ನೀಡಿತು, ಇದನ್ನು ಅವನು ನಂತರ ಕಾನೂನು ಅಧಿಕಾರಿಗಳ ವಿರುದ್ಧವೇ ಬಳಸಿಕೊಂಡನು. ಅವನು ಡ್ರಗ್ ಕಾರ್ಟೆಲ್ ನಡೆಸುತ್ತಿದ್ದ ರೊಸಲಿಂಡಾ ಗೊನ್ಜಾಲೆಜ್ ವೇಲೆನ್ಸಿಯಾನನ್ನು ವಿವಾಹವಾದನು, ಇದು ಅವನಿಗೆ ಮೆಕ್ಸಿಕೋ ಭೂಗತ ಜಗತ್ತಿನಲ್ಲಿ ಆರ್ಥಿಕ ಬೆಂಬಲ ಮತ್ತು ನೆಲೆಯನ್ನು ಒದಗಿಸಿತು.
CJNG ಸ್ಥಾಪನೆ: ಸಿನಾಲೋವಾ ಡಾನ್ ನಾಚೋ ಕೊರೊನೆಲ್ ಸಾವಿನ ನಂತರ, ಎಲ್ ಮೆಂಚೊ ತನ್ನದೇ ಆದ CJNG (ಕಾರ್ಟೆಲ್ ಜಲಿಸ್ಕೋ ನುವಾ ಜೆನೆರೇಶನ್) ಎಂಬ ಗುಂಪನ್ನು ರಚಿಸಿದನು ಮತ್ತು ಸಂಪೂರ್ಣ ಡ್ರಗ್ ಸಾಮ್ರಾಜ್ಯವನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಂಡನು.
ಹಿಂಸಾಚಾರದ ಹೊಸ ಮುಖ
ತನ್ನ ಪೂರ್ವಜರಿಗಿಂತ ಭಿನ್ನವಾಗಿ, ಎಲ್ ಮೆಂಚೊ ಕಾರ್ಟೆಲ್ನಲ್ಲಿ ಹೊಸ ಮಟ್ಟದ ಹಿಂಸಾಚಾರವನ್ನು ಪರಿಚಯಿಸಿದನು. ಅವನ ಕಾರ್ಯಾಚರಣಾ ವಿಧಾನಗಳು ಅತ್ಯಂತ ಕ್ರೂರವಾಗಿದ್ದವು. ಪೊಲೀಸರನ್ನು ಹೊಡೆದುರುಳಿಸಲು ಅವನು ಸುಧಾರಿತ ಸ್ಫೋಟಕ ಸಾಧನಗಳು (IED) ಮತ್ತು ರಾಕೆಟ್ ಚಾಲಿತ ಗ್ರೆನೇಡ್ಗಳನ್ನು ಬಳಸಲಾರಂಭಿಸಿದನು. ಇದರಿಂದಾಗಿ ಮೆಕ್ಸಿಕೋದಲ್ಲಿ ಹಿಂಸಾಚಾರ ಸಾಮಾನ್ಯವಾಯಿತು ಮತ್ತು ಕಾನೂನು ಹಾಗೂ ನ್ಯಾಯಾಂಗ ವ್ಯವಸ್ಥೆಯು ಸಂಪೂರ್ಣವಾಗಿ ನಾಶವಾಯಿತು.
ಅಂತ್ಯದ ಆರಂಭ
ಈ ಕಾರ್ಟೆಲ್ ಮುಖ್ಯಸ್ಥ ಇಡೀ ದಕ್ಷಿಣ ಮತ್ತು ಉತ್ತರ ಅಮೆರಿಕಾವನ್ನು ಭಯಭೀತಗೊಳಿಸಲು ಪ್ರಾರಂಭಿಸಿದನು. ವರ್ಷಗಳ ಕಾಲ ಅವನು ತೆರೆಯ ಮರೆಯಲ್ಲಿ ಜೀವನ ನಡೆಸುತ್ತಾ ಮೆಕ್ಸಿಕೋವನ್ನು ಕಾನೂನು ರಹಿತ ರಾಜ್ಯವನ್ನಾಗಿ ಮಾಡಿದನು. ಮೆಕ್ಸಿಕೋ ಪೊಲೀಸರಿಂದ ಅವನನ್ನು ಹಿಡಿಯಲು ಸಾಧ್ಯವಿಲ್ಲ ಎಂದು ಅಧಿಕಾರಿಗಳು ಅರಿತುಕೊಂಡಾಗ, ಅಮೆರಿಕಾ ಮಧ್ಯಪ್ರವೇಶಿಸಿತು.
ಅವನನ್ನು ಪತ್ತೆಹಚ್ಚಲು ಅಮೆರಿಕಾ ಹೊಸ ಜಂಟಿ ಕಾರ್ಯಪಡೆಯನ್ನು (Task Force) ರಚಿಸಿತು. ಅಂತಿಮವಾಗಿ, ಫೆಬ್ರವರಿ 22, 2026 ರಂದು ಮೆಕ್ಸಿಕೋ ಅವನ ಮತ್ತು ಅವನ ಗ್ಯಾಂಗ್ ಮೇಲೆ "ಸರ್ಜಿಕಲ್ ಸ್ಟ್ರೈಕ್" ನಡೆಸಿತು. ಅವರು ಕಾರ್ಯಪಡೆಯ ಮೇಲೆ ಗುಂಡಿನ ದಾಳಿ ನಡೆಸುವ ಮೂಲಕ ಪ್ರತಿದಾಳಿ ಮಾಡಿದರು. ಈ ಸಂಘರ್ಷದಲ್ಲಿ ಎಲ್ ಮೆಂಚೊಗೆ ಗುಂಡು ತಗುಲಿತು.
ಅವನನ್ನು ಜೀವಂತವಾಗಿ ಸೆರೆಹಿಡಿಯಲಾಯಿತು, ಆದರೆ ಅವನ ದೇಹದ ಮೇಲೆ ಹಲವಾರು ಗಾಯಗಳಾಗಿದ್ದರಿಂದ ಅವನ ಸ್ಥಿತಿ ಗಂಭೀರವಾಗಿತ್ತು. ವೈದ್ಯಕೀಯ ನೆರವಿಗಾಗಿ ಕರೆದೊಯ್ಯುವ ಮಾರ್ಗಮಧ್ಯೆ ಅವನು ಮೃತಪಟ್ಟನು. ಈ ಮೂಲಕ ಮೆಕ್ಸಿಕೋ ಡ್ರಗ್ ಕಾರ್ಟೆಲ್ನ ಮತ್ತೊಬ್ಬ ಕುಖ್ಯಾತ ಡಾನ್ನ ಅಧ್ಯಾಯ ಕೊನೆಗೊಂಡಿತು.