ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಸೈಬರ್ ಅಪರಾಧಿಗಳು ಹೊಸ ಹೊಸ ದಾರಿಗಳ ಮೂಲಕ ಜನರನ್ನು ವಂಚಿಸಲು ಮುಂದಾಗುತ್ತಿದ್ದಾರೆ. ಈ ಹಿಂದೆ ಸಿಬಿಐ ಅಧಿಕಾರಿಗಳು, ಮುಂಬೈ ಪೊಲೀಸರು ಅಥವಾ ಕೇಂದ್ರ ತನಿಖಾ ಸಂಸ್ಥೆಗಳ ಹೆಸರಿನಲ್ಲಿ ಬೆದರಿಸುತ್ತಿದ್ದ ಖದೀಮರು, ಈಗ ನೇರವಾಗಿ ಬೆಂಗಳೂರು ನಗರ ಪೊಲೀಸ್ ಆಯುಕ್ತರ ಹೆಸರನ್ನೇ ಬಳಸಿಕೊಂಡು 'ಡಿಜಿಟಲ್ ಅರೆಸ್ಟ್' ಮಾಡಲು ಯತ್ನಿಸಿರುವುದು ಬೆಳಕಿಗೆ ಬಂದಿದೆ.

ನಡೆದಿದ್ದೇನು?

ನಗರದ ಮಹಿಳೆಯೊಬ್ಬರಿಗೆ ಖಾಸಗಿ ನಂಬರ್‌ನಿಂದ ಟೆಲಿಕಾಲ್ ಬಂದಿದೆ. "ನಿಮ್ಮ ತಾಯಿ ಅಕ್ರಮ ಕೃತ್ಯವೊಂದರಲ್ಲಿ ಭಾಗಿಯಾಗಿದ್ದಾರೆ, ಅವರ ಮೇಲೆ ಗಂಭೀರ ಪ್ರಕರಣ ದಾಖಲಾಗಿದೆ" ಎಂದು ಹೇಳಿ ಸೈಬರ್ ಕಳ್ಳರು ಮಹಿಳೆಯನ್ನು ಗಾಬರಿಗೊಳಿಸಿದ್ದಾರೆ. ನಂತರ ಈ ಕರೆಯನ್ನು ವಿಡಿಯೋ ಕಾಲ್‌ಗೆ ಕನ್ವರ್ಟ್ ಮಾಡಿ, ಮಹಿಳೆಯ ಮಗಳ ಜೊತೆಗೂ ಮಾತನಾಡಿದ್ದಾರೆ. "ನಿಮ್ಮ ತಾಯಿ ತನಿಖೆಗೆ ಸಹಕರಿಸಬೇಕು, ನಿಮ್ಮ ಮನೆಯ ಲೊಕೇಶನ್ ಕಳುಹಿಸಿ, ನಾವು ಅಲ್ಲಿಗೆ ಬರಬೇಕು" ಎಂದು ಬೆದರಿಕೆ ಹಾಕಿದ್ದಾರೆ.

ನಕಲಿ ದಾಖಲೆಗಳ ಸುರಿಮಳೆ!

ಮಹಿಳೆಯನ್ನು ನಂಬಿಸಲು ಈ ಖದೀಮರು ಸೃಷ್ಟಿಸಿದ್ದ ನಕಲಿ ದಾಖಲೆಗಳನ್ನು ನೋಡಿ ಪೊಲೀಸರೇ ದಂಗಾಗಿದ್ದಾರೆ.

ಕಮಿಷನರ್ ಸೀಲ್ ಮತ್ತು ಸಹಿ: ಬೆಂಗಳೂರು ನಗರ ಪೊಲೀಸ್ ಆಯುಕ್ತರಾದ ಬಿ. ದಯಾನಂದ್ ಅವರ ಬದಲಿಗೆ, ಈ ಹಿಂದೆ ಎಡಿಜಿಪಿ ಆಗಿದ್ದ ಸೀಮಾಂತ್ ಕುಮಾರ್ ಸಿಂಗ್ ಅವರ ಹೆಸರು, ಸೀಲ್ ಮತ್ತು ಸಹಿಯನ್ನು ಬಳಸಿ ನಕಲಿ ಆದೇಶ ಪ್ರತಿ ಸೃಷ್ಟಿಸಲಾಗಿತ್ತು.

ಸುಪ್ರೀಂ ಕೋರ್ಟ್ ಹೆಸರಿನಲ್ಲಿ ಪತ್ರ: ಈ ತನಿಖೆಗೆ ಸುಪ್ರೀಂ ಕೋರ್ಟ್ ಆದೇಶವಿದೆ ಎಂಬಂತೆ ನಕಲಿ ದಾಖಲೆ ತೋರಿಸಲಾಗಿತ್ತು.

ಸಿಐಡಿ ವರದಿ: ಕರ್ನಾಟಕ ಸಿಐಡಿಯಿಂದ ಪ್ರಕರಣವೊಂದರ ಆರೋಪಿಗಳನ್ನು ಅರೆಸ್ಟ್ ಮಾಡಲಾಗಿದೆ ಎನ್ನುವ ಸುಳ್ಳು ವರದಿಯನ್ನು ಸೃಷ್ಟಿಸಿ ಕಳುಹಿಸಿದ್ದರು.

ನೈನಾ ಪ್ರಕಾಶ್ ಹೆಸರಲ್ಲಿ ವಂಚನೆ: ನೈನಾ ಪ್ರಕಾಶ್ ಎಂಬುವರ ವಿರುದ್ಧ ಕೆಲವು ದಾಖಲೆಗಳನ್ನು ಸೃಷ್ಟಿಸಿ, ಮಹಿಳೆಯನ್ನು ಹಣಕ್ಕಾಗಿ ಅಥವಾ ವೈಯಕ್ತಿಕ ಮಾಹಿತಿ ನೀಡುವಂತೆ ಒತ್ತಾಯಿಸಿದ್ದರು.

ಮಹಿಳೆಯ ಸಮಯಪ್ರಜ್ಞೆ

ಖದೀಮರು ಕಳುಹಿಸಿದ ದಾಖಲೆಗಳನ್ನು ಗಮನಿಸಿದ ಮಹಿಳೆಗೆ ಸಂಶಯ ಮೂಡಿದೆ. ಕೂಡಲೇ ಅವರು ಗಾಬರಿಯಾಗದೆ, ಬೆಂಗಳೂರು ಪೊಲೀಸರ ಅಧಿಕೃತ ಇ-ಮೇಲ್ ಮತ್ತು Cybercrime.gov.in ಪೋರ್ಟಲ್ ಮೂಲಕ ದೂರು ದಾಖಲಿಸಿದ್ದಾರೆ. ಮಹಿಳೆಯ ಸಮಯಪ್ರಜ್ಞೆಯಿಂದಾಗಿ ದೊಡ್ಡ ಮಟ್ಟದ ವಂಚನೆ ತಪ್ಪಿದಂತಾಗಿದೆ.

ಪೊಲೀಸರ ಎಚ್ಚರಿಕೆ

ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿರುವ ಬೆಂಗಳೂರು ನಗರ ಪೊಲೀಸರು ತನಿಖೆ ಕೈಗೆತ್ತಿಕೊಂಡಿದ್ದಾರೆ. "ಯಾವುದೇ ಪೊಲೀಸ್ ಅಧಿಕಾರಿಗಳು ವಿಡಿಯೋ ಕಾಲ್ ಮೂಲಕ ನಿಮ್ಮನ್ನು ಅರೆಸ್ಟ್ ಮಾಡುವುದಿಲ್ಲ ಅಥವಾ ಮನೆಯ ಲೊಕೇಶನ್ ಕೇಳಿ ಹಣಕ್ಕಾಗಿ ಡಿಮ್ಯಾಂಡ್ ಮಾಡುವುದಿಲ್ಲ. ಇಂತಹ ಕರೆಗಳು ಬಂದರೆ ತಕ್ಷಣ ಹತ್ತಿರದ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿ ಅಥವಾ 1930 ಗೆ ಕರೆ ಮಾಡಿ" ಎಂದು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.