ರಾಮನಗರ: ನೀವು ಬೆಂಗಳೂರು-ಮೈಸೂರು ದಶಪಥ ಹೆದ್ದಾರಿಯಲ್ಲಿ ಆಗಾಗ್ಗೆ ಸಂಚರಿಸುತ್ತಿದ್ದರೆ ನಿಮ್ಮ ಜೇಬಿಗೆ ಮತ್ತಷ್ಟು ಕತ್ತರಿ ಬೀಳುವುದು ಗ್ಯಾರಂಟಿ. ಹೌದು, ಇಂದಿನಿಂದ (ಏಪ್ರಿಲ್ 1) ಅನ್ವಯವಾಗುವಂತೆ ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್‌ವೇನಲ್ಲಿ ಟೋಲ್ ದರವನ್ನು ಹೆಚ್ಚಳ ಮಾಡಿ ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಆದೇಶ ಹೊರಡಿಸಿದೆ.

ಹೆದ್ದಾರಿ ಪ್ರಾಧಿಕಾರದ ನಿಯಮಾವಳಿಗಳ ಪ್ರಕಾರ ಪ್ರತಿ ವರ್ಷ ಏಪ್ರಿಲ್ 1 ರಿಂದ ಟೋಲ್ ದರವನ್ನು ಪರಿಷ್ಕರಿಸಲಾಗುತ್ತದೆ. ಅದರಂತೆ ಈ ವರ್ಷವೂ ವಿವಿಧ ಮಾದರಿಯ ವಾಹನಗಳ ಟೋಲ್ ದರದಲ್ಲಿ 5 ರೂಪಾಯಿಯಿಂದ ಹಿಡಿದು 25 ರೂಪಾಯಿವರೆಗೆ ಹೆಚ್ಚಳ ಮಾಡಲಾಗಿದೆ.

ಒಂದು ಬದಿಯ ಪ್ರಯಾಣಕ್ಕೆ ಈಗ ₹355!

ಬೆಂಗಳೂರು ಮತ್ತು ಮೈಸೂರು ನಡುವಿನ 118 ಕಿಲೋಮೀಟರ್ ಉದ್ದದ ಈ ಹೆದ್ದಾರಿಯಲ್ಲಿ ಎರಡು ಕಡೆ ಟೋಲ್ ಸಂಗ್ರಹಿಸಲಾಗುತ್ತದೆ. ರಾಮನಗರ ಜಿಲ್ಲೆಯ ಕಣಮಿಣಕಿ ಹಾಗೂ ಮಂಡ್ಯ ಜಿಲ್ಲೆಯ ಗಣಂಗೂರು ಟೋಲ್ ಪ್ಲಾಜಾಗಳಲ್ಲಿ ಇಂದಿನಿಂದಲೇ ಪರಿಷ್ಕೃತ ದರ ಜಾರಿಗೆ ಬಂದಿದೆ. ಈ ಹಿಂದೆ ಬೆಂಗಳೂರಿನಿಂದ ಮೈಸೂರಿಗೆ ಒಂದು ಕಡೆಯ ಪ್ರಯಾಣಕ್ಕೆ ಒಟ್ಟು 345 ರೂಪಾಯಿ ಟೋಲ್ ನೀಡಬೇಕಿತ್ತು. ಆದರೆ ಇಂದಿನಿಂದ ಅದು 355 ರೂಪಾಯಿಗೆ ಏರಿಕೆಯಾಗಿದೆ.

ವಾಹನಗಳ ಹೊಸ ಟೋಲ್ ದರಗಳ ಪಟ್ಟಿ ಹೀಗಿದೆ:

ಹೆದ್ದಾರಿ ಪ್ರಾಧಿಕಾರ ಪ್ರಕಟಿಸಿರುವ ಹಳೆಯ ಮತ್ತು ಹೊಸ ದರಗಳ ಸಂಪೂರ್ಣ ವಿವರ ಇಲ್ಲಿದೆ:

ವಾಹನದ ಮಾದರಿ | ಹಳೆಯ ದರ (₹) | ಹೊಸ ದರ (₹) | ಹೆಚ್ಚಳವಾದ ಮೊತ್ತ (₹)

ಕಾರ್ / ಜೀಪ್ / ವ್ಯಾನ್ | 175 | 180 | 5

ಲಘು ವಾಣಿಜ್ಯ ವಾಹನ (LGV) | 280 | 285 | 5

ಟ್ರಕ್ / ಬಸ್ | 585 | 600 | 15

ಭಾರೀ ವಾಣಿಜ್ಯ ವಾಹನ | 640 | 655 | 15

ಮಲ್ಟಿ ಆಕ್ಸಲ್ ವಾಹನ (ಭಾರೀ ವಾಹನ) | 920 | 940 | 20

ಹೆಚ್ಚಿನ ಆಕ್ಸಲ್ ವಾಹನಗಳು | 1120 | 1145 | 25

ಈ ಮೇಲಿನ ದರಗಳು ಕೇವಲ ಒಂದು ಬದಿಯ (Single Journey) ಟೋಲ್ ಶುಲ್ಕವಾಗಿದ್ದು, ಅದೇ ದಿನ ಹಿಂದಿರುಗುವ ವಾಹನಗಳಿಗೆ ಹಾಗೂ ಮಾಸಿಕ ಪಾಸ್‌ಗಳಿಗೆ ನಿಯಮಾನುಸಾರ ರಿಯಾಯಿತಿಗಳು ಮುಂದುವರಿಯಲಿವೆ. ಈಗಾಗಲೇ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ಕಂಗಾಲಾಗಿರುವ ಜನಸಾಮಾನ್ಯರಿಗೆ ಮತ್ತು ಸಾರಿಗೆ ಸಂಸ್ಥೆಗಳಿಗೆ ಹೆದ್ದಾರಿ ಪ್ರಾಧಿಕಾರದ ಈ ನಡೆ ಮತ್ತಷ್ಟು ಆರ್ಥಿಕ ಹೊರೆಯಾಗಿ ಪರಿಣಮಿಸಿದೆ.