ದಿಸ್ಪುರ: "ಭಾರತದ ಅತ್ಯಂತ ನಿರ್ಣಾಯಕ ಸಮಯದಲ್ಲಿ ವಿರೋಧ ಪಕ್ಷಗಳು ನಮ್ಮ ಸಶಸ್ತ್ರ ಪಡೆಗಳ ನೈತಿಕತೆಯನ್ನು ಕುಗ್ಗಿಸುವ ಕೆಲಸ ಮಾಡಿವೆ. ಕಾಂಗ್ರೆಸ್ ಪಕ್ಷವು ಪಾಕಿಸ್ತಾನದ ವಕ್ತಾರರಂತೆ ವರ್ತಿಸುತ್ತಿದೆ" ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಅತ್ಯಂತ ಗಂಭೀರ ಆರೋಪ ಮಾಡಿದ್ದಾರೆ. ಅಸ್ಸಾಂ ವಿಧಾನಸಭಾ ಚುನಾವಣೆಯ ಹಿನ್ನೆಲೆಯಲ್ಲಿ ಬಾರ್ಪೇಟಾದಲ್ಲಿ ನಡೆದ ಬೃಹತ್ ಚುನಾವಣಾ ರ‍್ಯಾಲಿಯನ್ನುದ್ದೇಶಿಸಿ ಮಾತನಾಡಿದ ಪ್ರಧಾನಿ ಮೋದಿ, ಕಾಂಗ್ರೆಸ್ ಹಾಗೂ ಅದರ ಮಿತ್ರಪಕ್ಷಗಳ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು.

'ಆಪರೇಷನ್ ಸಿಂಧೂರ್' ಪ್ರಸ್ತಾಪಿಸಿ ಕಿಡಿ!

ಭಾರತ ನಡೆಸಿದ 'ಆಪರೇಷನ್ ಸಿಂಧೂರ್' ಕಾರ್ಯಾಚರಣೆಯ ಸಂದರ್ಭವನ್ನು ನೆನಪಿಸಿಕೊಂಡ ಪ್ರಧಾನಿ ಮೋದಿ, "ಆಪರೇಷನ್ ಸಿಂಧೂರ್ ಕಾರ್ಯಾಚರಣೆ ವೇಳೆ ಕಾಂಗ್ರೆಸ್ ಪಕ್ಷವು ಪಾಕಿಸ್ತಾನ ಹೇಳಿಕೊಟ್ಟಂತೆ ಮಾತನಾಡಿದೆ. ಕೆಲವೇ ಗಂಟೆಗಳಲ್ಲಿ ಭಾರತವು ಪಾಕಿಸ್ತಾನಕ್ಕೆ ಶರಣಾಗಬೇಕು ಎಂದು ವಿಪಕ್ಷಗಳು ಒತ್ತಾಯ ಮಾಡಿದ್ದವು. ಪಾಕಿಸ್ತಾನವು ಜಗತ್ತಿನ ಮುಂದೆ ಇಡುತ್ತಿದ್ದ ಅದೇ ಸುಳ್ಳು ನಿರೂಪಣೆಯನ್ನು ಕಾಂಗ್ರೆಸ್ ಕೂಡ ಪ್ರತಿಧ್ವನಿಸಿತ್ತು. ಕಾಂಗ್ರೆಸ್ ನಾಯಕರಿಗೂ ಮತ್ತು ಪಾಕಿಸ್ತಾನಕ್ಕೂ ಇರುವ ಆಳವಾದ ಸಂಪರ್ಕ ಯಾವಾಗಲೂ ಜೀವಂತವಾಗಿದೆ" ಎಂದು ಮೋದಿ ಆರೋಪಿಸಿದರು.

ಕಾಂಗ್ರೆಸ್ ಹೇಳಿಕೆಗಳಿಂದ ಶತ್ರುಗಳಿಗೆ ಧೈರ್ಯ!

"ದೇಶದ ಸೈನ್ಯವು ನಡೆಸಿದ ಸರ್ಜಿಕಲ್ ದಾಳಿ ಇರಲಿ ಅಥವಾ ವಾಯುದಾಳಿ (Air Strike) ಇರಲಿ, ಕಾಂಗ್ರೆಸ್ ಯಾವಾಗಲೂ ಶತ್ರು ರಾಷ್ಟ್ರಗಳ ಕಾರ್ಯಸೂಚಿಯನ್ನೇ ಎತ್ತಿ ಹಿಡಿಯುತ್ತಿದೆ. ಕಾಂಗ್ರೆಸ್ ನಾಯಕರು ನೀಡುವ ಇಂತಹ ಬೇಜವಾಬ್ದಾರಿ ಹೇಳಿಕೆಗಳು ಜಾಗತಿಕ ಮಟ್ಟದಲ್ಲಿ ಭಾರತದ ಸ್ಥಾನವನ್ನು ದುರ್ಬಲಗೊಳಿಸುತ್ತವೆ ಹಾಗೂ ದೇಶದ ಶತ್ರು ಶಕ್ತಿಗಳಿಗೆ ಮತ್ತಷ್ಟು ಧೈರ್ಯ ತುಂಬುತ್ತವೆ" ಎಂದು ಪ್ರಧಾನಿ ಕಿಡಿಕಾರಿದರು.

OROP ಹೆಸರಲ್ಲಿ ಸೈನ್ಯಕ್ಕೆ ದ್ರೋಹ ಹಾಗೂ ನುಸುಳುಕೋರರ ರಕ್ಷಣೆ!

ಇದೇ ವೇಳೆ ಭಾರತೀಯ ಸಶಸ್ತ್ರ ಪಡೆಗಳ ಕಲ್ಯಾಣದ ಬಗ್ಗೆ ಮಾತನಾಡಿದ ಪ್ರಧಾನಿ, " 'ಒಂದು ಶ್ರೇಣಿ ಒಂದು ಪಿಂಚಣಿ' (OROP) ಯೋಜನೆಯನ್ನು ಜಾರಿಗೆ ತರದೆ ವರ್ಷಗಳ ಕಾಲ ವಿಳಂಬ ಮಾಡುವ ಮೂಲಕ ಕಾಂಗ್ರೆಸ್ ನಮ್ಮ ವೀರ ಯೋಧರಿಗೆ ದೊಡ್ಡ ದ್ರೋಹ ಬಗೆದಿದೆ. ಆದರೆ ನಮ್ಮ ಸರ್ಕಾರ ಸೈನಿಕರ ಕಲ್ಯಾಣಕ್ಕೆ ಸದಾ ಆದ್ಯತೆ ನೀಡಿದೆ" ಎಂದರು. ಅಲ್ಲದೆ, ಅಸ್ಸಾಂನ ಅಕ್ರಮ ವಲಸಿಗರ ವಿಷಯವನ್ನು ಪ್ರಸ್ತಾಪಿಸಿದ ಮೋದಿ, ಕಾಂಗ್ರೆಸ್ ಪಕ್ಷವು ಅಸ್ಸಾಂನಲ್ಲಿ ನುಸುಳುಕೋರರನ್ನು ರಕ್ಷಿಸಲು ಹಲ್ಲುಬಿಟ್ಟು ಪ್ರಯತ್ನಿಸುತ್ತಿದೆ ಎಂದು ನೇರ ಆರೋಪ ಮಾಡಿದರು.