ಚಿಕ್ಕಮಗಳೂರು: ಕಾಫಿನಾಡಿನ ಪ್ರಸಿದ್ಧ ಪ್ರವಾಸಿ ತಾಣ ದತ್ತಪೀಠದ ಮಾಣಿಕ್ಯಧಾರಾ ಬಳಿ ನಾಪತ್ತೆಯಾಗಿರುವ ಕೇರಳ ಮೂಲದ ಬಾಲಕಿಯ ಪತ್ತೆಗಾಗಿ ಪೊಲೀಸ್, ಅಗ್ನಿಶಾಮಕ ಮತ್ತು ಅರಣ್ಯ ಇಲಾಖೆಯ ಸಿಬ್ಬಂದಿಗಳು ನಡೆಸುತ್ತಿರುವ ಸಾಹಸಮಯ ಕಾರ್ಯಾಚರಣೆ ಈಗ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ. ನಿಂತರೆ ಕಾಲು ನಡುಗುವಂತಹ ಕಡಿದಾದ ಬೆಟ್ಟ-ಗುಡ್ಡಗಳಲ್ಲಿ ಸಿಬ್ಬಂದಿಗಳು ಪ್ರಾಣದ ಹಂಗು ತೊರೆದು ಶೋಧ ನಡೆಸುತ್ತಿದ್ದಾರೆ.

ಸೊಂಟಕ್ಕೆ ಹಗ್ಗ ಕಟ್ಟಿ ಪಾತಾಳಕ್ಕೆ ಇಳಿದ ಸಿಬ್ಬಂದಿ!

ಮಾಣಿಕ್ಯಧಾರಾ ಬಳಿಯ ಭೂಪ್ರದೇಶ ಅತ್ಯಂತ ಅಪಾಯಕಾರಿಯಾಗಿದೆ. ಸುಮಾರು 300 ಅಡಿಗೂ ಹೆಚ್ಚು ಆಳವಿರುವ ಕಂದಕಕ್ಕೆ ಪೊಲೀಸ್ ಮತ್ತು ಅಗ್ನಿಶಾಮಕ ದಳದ ಸಿಬ್ಬಂದಿಗಳು ಸೊಂಟಕ್ಕೆ ಹಗ್ಗ ಕಟ್ಟಿಕೊಂಡು ಇಳಿಯುತ್ತಿದ್ದಾರೆ. ಒಂದು ಸಣ್ಣ ತಪ್ಪು ಸಂಭವಿಸಿದರೂ ಪ್ರಾಣಾಪಾಯ ಖಚಿತ ಎನ್ನುವಂತಹ ಜಾಗದಲ್ಲಿ, ಕಲ್ಲು ಬಂಡೆಗಳ ನಡುವೆ ಬಾಲಕಿಯ ಸುಳಿವಿಗಾಗಿ ಅನ್ವೇಷಣೆ ನಡೆಸುತ್ತಿದ್ದಾರೆ.

ನಿಸರ್ಗದ ಸವಾಲು: ರಣ ಬಿಸಿಲು ಮತ್ತು ಬಿಸಿಗಾಳಿ

ದಟ್ಟ ಕಾಡಿನ ನಡುವೆ ಕಾರ್ಯಾಚರಣೆ ನಡೆಸುತ್ತಿರುವ ತಂಡಕ್ಕೆ ಪ್ರಕೃತಿಯೂ ಸವಾಲೊಡ್ಡುತ್ತಿದೆ. ಜಿಲ್ಲೆಯಲ್ಲಿ ಈಗ ರಣ ಬಿಸಿಲು ಹೆಚ್ಚಾಗಿದ್ದು, ಬೀಸುವ ಗಾಳಿಯೂ ಬಿಸಿಯಾಗುತ್ತಿದೆ. ಇಂತಹ ಕಠಿಣ ಹವಾಮಾನದಲ್ಲೂ ಕಿಂಚಿತ್ತೂ ಎದೆಗುಂದದೆ, ಅತ್ಯಂತ ಕಿರಿದಾದ ಜಾಗಗಳಲ್ಲಿ ಸಿಬ್ಬಂದಿಗಳು ಶೋಧ ಮುಂದುವರಿಸಿದ್ದಾರೆ. ಬೃಹತ್ ಕಲ್ಲು ಬಂಡೆಗಳ ಬೆಟ್ಟವನ್ನು ನೋಡಿದರೆ ಸಾಧಾರಣ ಜನರಿಗೆ ನಡುಕ ಹುಟ್ಟುತ್ತದೆ, ಆದರೆ ನಮ್ಮ ರಕ್ಷಕರು ಬಾಲಕಿಗಾಗಿ ಪ್ರತಿ ಬಂಡೆಯನ್ನೂ ಇಳಿದು ತಪಾಸಣೆ ಮಾಡುತ್ತಿದ್ದಾರೆ.

ಜಂಟಿ ಕಾರ್ಯಾಚರಣೆಗೆ 'ಹ್ಯಾಟ್ಸಾಫ್'

ಚಿಕ್ಕಮಗಳೂರು ಗ್ರಾಮಾಂತರ ಠಾಣಾ ವ್ಯಾಪ್ತಿಯಲ್ಲಿ ಈ ಪ್ರಕರಣ ನಡೆದಿದ್ದು, ಪೊಲೀಸರಿಗೆ ಅರಣ್ಯ ಇಲಾಖೆ ಕೂಡ ಸಂಪೂರ್ಣ ಸಾಥ್ ನೀಡುತ್ತಿದೆ. ಕಾಡಿನ ದಾರಿ ಮತ್ತು ಗುಡ್ಡಗಾಡು ಪ್ರದೇಶದ ಪರಿಚಯವಿರುವ ಅರಣ್ಯ ಸಿಬ್ಬಂದಿಗಳು ಶೋಧ ತಂಡಕ್ಕೆ ಮಾರ್ಗದರ್ಶನ ನೀಡುತ್ತಿದ್ದಾರೆ. ಹಗಲಿರುಳು ಎನ್ನದೆ ಕೆಲಸ ಮಾಡುತ್ತಿರುವ ಈ ಮೂರೂ ಇಲಾಖೆಗಳ ಸಮನ್ವಯ ಮತ್ತು ಧೈರ್ಯಕ್ಕೆ ಸಾರ್ವಜನಿಕರು ಶ್ಲಾಘನೆ ವ್ಯಕ್ತಪಡಿಸುತ್ತಿದ್ದಾರೆ.

ಏನಿದು ಪ್ರಕರಣ?

ಕೇರಳದಿಂದ ದತ್ತಪೀಠಕ್ಕೆ ಪ್ರವಾಸಕ್ಕೆ ಬಂದಿದ್ದ ಕುಟುಂಬದ ಬಾಲಕಿಯೊಬ್ಬಳು ಮಾಣಿಕ್ಯಧಾರಾ ಬಳಿ ಇದ್ದಕ್ಕಿದ್ದಂತೆ ನಾಪತ್ತೆಯಾಗಿದ್ದಾಳೆ. ಬಾಲಕಿ ಆಕಸ್ಮಿಕವಾಗಿ ಕಂದಕಕ್ಕೆ ಬಿದ್ದಿರಬಹುದು ಎಂಬ ಶಂಕೆಯ ಮೇಲೆ ಈ ಬೃಹತ್ ಕಾರ್ಯಾಚರಣೆ ಹಮ್ಮಿಕೊಳ್ಳಲಾಗಿದೆ. ಬಾಲಕಿ ಶೀಘ್ರವೇ ಸುರಕ್ಷಿತವಾಗಿ ಸಿಗಲಿ ಎಂಬುದು ಎಲ್ಲರ ಆಶಯವಾಗಿದೆ.