ಬೆಳಗಾವಿ: ಪಂಚಮಸಾಲಿ ಪೀಠದ ಜಯಮೃತ್ಯುಂಜಯ ಸ್ವಾಮೀಜಿಗಳ ಅಶ್ಲೀಲ ವಿಡಿಯೋ ವೈರಲ್ ಪ್ರಕರಣವು ಈಗ ಮಠಾಧೀಶರ ವಲಯದಲ್ಲೇ ಭಾರಿ ಆಕ್ರೋಶಕ್ಕೆ ಕಾರಣವಾಗಿದೆ. ಕಿತ್ತೂರು ತಾಲೂಕಿನ ದೇಗನೊಳ್ಳಿ ಗ್ರಾಮದ ಮಡಿವಾಳೇಶ್ವರ ಮಠದ ವೀರೇಶ್ವರ ಸ್ವಾಮೀಜಿ ಅವರು ಜಯಮೃತ್ಯುಂಜಯ ಶ್ರೀಗಳ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿ, ತೀವ್ರ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಪಂಚಮಸಾಲಿ ಸಮಾಜಕ್ಕೆ ಅವಮಾನ: ವೀರೇಶ್ವರ ಶ್ರೀಗಳ ಕಿಡಿ

ಮಾಧ್ಯಮಗಳೊಂದಿಗೆ ಮಾತನಾಡಿದ ವೀರೇಶ್ವರ ಸ್ವಾಮೀಜಿ, 2A ಮೀಸಲಾತಿ ಹೋರಾಟದ ಮೂಲಕ ಸಮಾಜದ ವಿಶ್ವಾಸ ಗಳಿಸಿದ್ದ ಜಯಮೃತ್ಯುಂಜಯ ಶ್ರೀಗಳು, ಈಗ ತಮ್ಮ ವೈಯಕ್ತಿಕ ನಡವಳಿಕೆಯಿಂದ ಇಡೀ ಪಂಚಮಸಾಲಿ ಸಮಾಜವನ್ನು ಮುಜುಗರಕ್ಕೆ ಈಡು ಮಾಡಿದ್ದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

"ನಾನೇ ಈ ಪೀಠದ ಪ್ರಧಾನ ಮಂತ್ರಿ ಎಂಬ ಅಹಂಕಾರ ಅವರಲ್ಲಿ ಮನೆಮಾಡಿತ್ತು. ಅತಿಯಾದ ರಾಜಕೀಯ ನಾಯಕರ ನಂಟು ಮತ್ತು ಅಧಿಕಾರದಾಹ ಇವತ್ತು ಅವರನ್ನು ಈ ಸ್ಥಿತಿಗೆ ತಂದು ನಿಲ್ಲಿಸಿದೆ. ಇವರಿಂದಾಗಿ ಸಮಾಜ ಇಂದು ತಲೆತಗ್ಗಿಸುವಂತಾಗಿದೆ," ಎಂದು ಅವರು ಹರಿಹಾಯ್ದರು.

ಪ್ರಾಮಾಣಿಕ ಮಠಾಧೀಶರಿಗೆ ಮುಜುಗರ

ಈ ಘಟನೆಯಿಂದ ಕೇವಲ ಪಂಚಮಸಾಲಿ ಸಮಾಜಕ್ಕೆ ಮಾತ್ರವಲ್ಲದೆ, ಇಡೀ ಮಠಾಧೀಶರ ಪರಂಪರೆಗೆ ಧಕ್ಕೆಯಾಗಿದೆ ಎಂದು ಸ್ವಾಮೀಜಿ ಆತಂಕ ವ್ಯಕ್ತಪಡಿಸಿದರು. "ಇಂತಹ ಅಪ್ರಿಯ ಘಟನೆಗಳಿಂದಾಗಿ ಪ್ರಾಮಾಣಿಕವಾಗಿ ಸೇವೆ ಮಾಡುತ್ತಿರುವ ಬಡ ಸ್ವಾಮೀಜಿಗಳನ್ನು ಜನ ಸಂಶಯದಿಂದ ನೋಡುವಂತಾಗಿದೆ. ನಮ್ಮ ಆಚಾರ-ವಿಚಾರಗಳಿಗೆ ಧಕ್ಕೆ ತಂದಿರುವ ಇಂತಹವರ ವಿರುದ್ಧ ಎಲ್ಲಾ ಮಠಾಧೀಶರು ಒಗ್ಗೂಡಿ ಹೋರಾಟ ಮಾಡುವುದು ಈಗ ಅನಿವಾರ್ಯ," ಎಂದು ಅವರು ಕರೆ ನೀಡಿದರು.

ರಾಜಕೀಯ ನಾಯಕರ ನಂಬಬೇಡಿ: ಕಟು ಎಚ್ಚರಿಕೆ

ಲಿಂಗಾಯತ ಸಮಾಜದ ಮುಗ್ಧತೆಯನ್ನು ದುರುಪಯೋಗಪಡಿಸಿಕೊಳ್ಳಲಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದ ಶ್ರೀಗಳು, "ರಾಜಕೀಯ ವ್ಯಕ್ತಿಗಳನ್ನು ನಂಬಿ ಹೋರಾಟಕ್ಕೆ ಇಳಿದರೆ ಅವರು ಯಾವಾಗ ಮುಳುಗಿಸುತ್ತಾರೆ ಎಂದು ಗೊತ್ತಾಗಲ್ಲ. ಲಿಂಗಾಯತ ಸಮಾಜ ಯಾರೇ ಹೋರಾಟಕ್ಕೆ ನಿಂತರೂ ಬೆಂಬಲಿಸುತ್ತದೆ, ಆದರೆ ಅಂತಹ ನಂಬಿಕೆಗೆ ಈಗ ದ್ರೋಹವಾಗಿದೆ," ಎಂದು ಮಾರ್ಮಿಕವಾಗಿ ಹೇಳಿದರು.

ಪ್ರಕರಣದ ಹಿನ್ನೆಲೆ:

ಕಳೆದ ಕೆಲವು ದಿನಗಳಿಂದ ಜಯಮೃತ್ಯುಂಜಯ ಸ್ವಾಮೀಜಿಗಳದ್ದು ಎನ್ನಲಾದ ಅಶ್ಲೀಲ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಇದು ರಾಜ್ಯ ರಾಜಕಾರಣ ಮತ್ತು ಧಾರ್ಮಿಕ ವಲಯದಲ್ಲಿ ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದೆ.