ಹೊಸದಿಲ್ಲಿ: ದೇಶದ ಕೋಟ್ಯಂತರ ಅಡುಗೆ ಅನಿಲ (LPG) ಬಳಕೆದಾರರಿಗೆ ಪ್ರಮುಖ ಸುದ್ದಿಯೊಂದಿದೆ. ಮೇ 1, 2026 ರಿಂದ ಜಾರಿಗೆ ಬರುವಂತೆ ಇಂಡೇನ್, ಭಾರತ್ ಗ್ಯಾಸ್ ಮತ್ತು ಎಚ್‌ಪಿ ಗ್ಯಾಸ್ ಕಂಪನಿಗಳು ತಮ್ಮ ನಿಯಮಗಳಲ್ಲಿ ಮಹತ್ವದ ಬದಲಾವಣೆಗಳನ್ನು ತರುತ್ತಿವೆ. ಹೆಚ್ಚುತ್ತಿರುವ ಬೇಡಿಕೆ ಮತ್ತು ಪೂರೈಕೆಯ ಸಮತೋಲನ ಕಾಯ್ದುಕೊಳ್ಳಲು ಈ ಹೊಸ ಮಾರ್ಗಸೂಚಿಗಳನ್ನು ರೂಪಿಸಲಾಗಿದೆ.

ಮೇ 1ರಿಂದ ಜಾರಿಯಾಗುವ ಪ್ರಮುಖ ಬದಲಾವಣೆಗಳು ಇಲ್ಲಿವೆ:

1. ಹೊಸ ಗ್ಯಾಸ್ ಕನೆಕ್ಷನ್ ತಾತ್ಕಾಲಿಕ ಸ್ಥಗಿತ

ಹೊಸ ಎಲ್‌ಪಿಜಿ ಕನೆಕ್ಷನ್ ಪಡೆಯಲು ಯೋಜಿಸುತ್ತಿದ್ದವರಿಗೆ ಮೇ ತಿಂಗಳಲ್ಲಿ ನಿರಾಸೆ ಕಾದಿದೆ. ಅಸ್ತಿತ್ವದಲ್ಲಿರುವ ಗ್ರಾಹಕರಿಗೆ ಸಮರ್ಪಕವಾಗಿ ಸಿಲಿಂಡರ್ ಪೂರೈಕೆ ಮಾಡುವ ಉದ್ದೇಶದಿಂದ ಹೊಸ ಸಂಪರ್ಕ ನೀಡುವುದನ್ನು ಒಂದು ತಿಂಗಳ ಕಾಲ (ಮೇ ತಿಂಗಳು) ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ.

2. ಬುಕಿಂಗ್ ನಡುವೆ ಕಡ್ಡಾಯ ಅಂತರ (Gap)

ಇನ್ನು ಮುಂದೆ ನಿಮಗೆ ಬೇಕಾದಾಗ ಸಿಲಿಂಡರ್ ಬುಕ್ ಮಾಡಲು ಸಾಧ್ಯವಿಲ್ಲ. ಪೂರೈಕೆ ಕೊರತೆ ನೀಗಿಸಲು ಕಂಪನಿಗಳು ಕಡ್ಡಾಯ ಅಂತರವನ್ನು ಜಾರಿಗೊಳಿಸಿವೆ. ಒಂದು ಸಿಲಿಂಡರ್ ಪಡೆದ ಬಳಿಕ ಮತ್ತೊಂದು ಸಿಲಿಂಡರ್ ಬುಕ್ ಮಾಡಲು ಕನಿಷ್ಠ 25 ದಿನಗಳ ಅಂತರವಿರಬೇಕು, ಎರಡು ರೀಫಿಲ್ ಬುಕಿಂಗ್ ನಡುವೆ ಕನಿಷ್ಠ 45 ದಿನಗಳ ಅಂತರವಿರಬೇಕು.

3. ಒಟಿಪಿ (OTP) ಇಲ್ಲದೆ ಸಿಲಿಂಡರ್ ಸಿಗಲ್ಲ

ಗ್ಯಾಸ್ ವಿತರಣೆಯಲ್ಲಿ ಅಕ್ರಮ ತಡೆಯಲು DAC (Delivery Authentication Code) ವ್ಯವಸ್ಥೆಯನ್ನು ಕಡ್ಡಾಯಗೊಳಿಸಲಾಗಿದೆ. ಸಿಲಿಂಡರ್ ವಿತರಣೆಯ ವೇಳೆ ನಿಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿಯನ್ನು ವಿತರಣಾ ಸಿಬ್ಬಂದಿಗೆ ನೀಡಲೇಬೇಕು. ಒಟಿಪಿ ಇಲ್ಲದಿದ್ದರೆ ವಿತರಣೆಯನ್ನು ತಿರಸ್ಕರಿಸುವ ಅಧಿಕಾರ ಸಿಬ್ಬಂದಿಗೆ ಇರುತ್ತದೆ.

4. ಬೆಲೆ ಏರಿಕೆಯ ಭೀತಿ?

ಪ್ರತಿ ತಿಂಗಳ 1ನೇ ತಾರೀಖಿನಂತೆ ಮೇ 1 ರಂದು ಸಹ ಗ್ಯಾಸ್ ದರ ಪರಿಷ್ಕರಣೆಯಾಗಲಿದೆ. ಸಾರ್ವತ್ರಿಕ ಚುನಾವಣೆಗಳು ಮುಗಿಯುತ್ತಿದ್ದಂತೆಯೇ ತೈಲ ಕಂಪನಿಗಳು ಅಡುಗೆ ಅನಿಲದ ಬೆಲೆಯನ್ನು ಏರಿಕೆ ಮಾಡುವ ಸಾಧ್ಯತೆ ಇದೆ ಎಂದು ಮಾರುಕಟ್ಟೆ ತಜ್ಞರು ಅಂದಾಜಿಸಿದ್ದಾರೆ.

5. ವಾಣಿಜ್ಯ ಬಳಕೆಯ ಮೇಲೆ ಕಣ್ಣು

ಮನೆ ಬಳಕೆಯ (Domestic) ಸಿಲಿಂಡರ್‌ಗಳನ್ನು ಹೋಟೆಲ್‌ಗಳು ಅಥವಾ ವಾಣಿಜ್ಯ ಉದ್ದೇಶಗಳಿಗೆ ಬಳಸುವವರ ಮೇಲೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುತ್ತಿದೆ. ಈಗಾಗಲೇ ದೇಶದ ಪ್ರಮುಖ ನಗರಗಳಲ್ಲಿ ಅಕ್ರಮ ದಾಳಿಗಳು ಆರಂಭವಾಗಿದ್ದು, ದುರುಪಯೋಗ ಮಾಡುವವರ ವಿರುದ್ಧ ಭಾರೀ ದಂಡ ವಿಧಿಸಲಾಗುತ್ತಿದೆ.

ಪರ್ಯಾಯ ಮಾರ್ಗಗಳತ್ತ ಗಮನಹರಿಸಿ

ಗ್ಯಾಸ್ ಕೊರತೆ ಮತ್ತು ಬೆಲೆ ಏರಿಕೆಯ ಹೊರೆ ತಪ್ಪಿಸಲು ಗ್ರಾಹಕರು PNG (ಪೈಪ್ಡ್ ನ್ಯಾಚುರಲ್ ಗ್ಯಾಸ್) ಅಥವಾ ಇಂಡಕ್ಷನ್ (ವಿದ್ಯುತ್) ಒಲೆಗಳನ್ನು ಬಳಸುವಂತೆ ತಜ್ಞರು ಸಲಹೆ ನೀಡಿದ್ದಾರೆ.

ಗಮನಿಸಿ: ನಿಮ್ಮ ಗ್ಯಾಸ್ ಏಜೆನ್ಸಿಯಲ್ಲಿ ಮೊಬೈಲ್ ಸಂಖ್ಯೆ ನೋಂದಣಿಯಾಗದಿದ್ದರೆ ಕೂಡಲೇ ಅಪ್‌ಡೇಟ್ ಮಾಡಿಸಿಕೊಳ್ಳಿ, ಇಲ್ಲದಿದ್ದರೆ ಮೇ 1ರ ನಂತರ ಸಿಲಿಂಡರ್ ಪಡೆಯಲು ತೊಂದರೆಯಾಗಬಹುದು.